التصرف الاخلاقي و التصرف الغير اخلاقي

في المحاضرة السابقة اتكلمنا عن المواقف اللي بتقابلنا و مش عارفين نحكم عليها هل  هي اخلاقية  ام غير اخلاقية و الدكتور طرح سؤالين :
1- لو انت في امتحان و في معلومة مش عارفها و انت عارف ان زميلك عارفها و المراقب مش شايفك هتغشها منه و لا لأ ؟ وليه ؟
2- لو انت في امتحان و زميلك عايز منك معلومة و المراقب مش شايفك و انت مش هتضر لو قولتله المعلومة دي تغششه ولا لأ ؟ و ليه ؟
و كانت الاجابات :
بالنسبة للسؤال الاول : %37 قالوا هنغش و الباقي رفضوا مبدأ الغش .
و السؤال التاني  : % 64 قالوا انهم هيغششوا زملائهم و الباقي رفض .
ودي تعتبر نسبة ممتازة زي الدكتور ما بيقول و ان احسن اجابة حصل عليها من خلال طرحه للسؤال ده علي مستوي 20 دفعة درس لها كانت %29 اغش و %60 اساعد علي الغش و اسوأ نتيجة كانت %90 اغش و %100 اساعد علي الغش !!
و كانت مبررات كل واحد لاجابته كالتالي :

1- نعم أغش لأن :  الامتحانات تعجيزية - الامتحانات بتيجي خيالية - لأن دي سنة الحياة في مصر !! - طلب المعلومة اسهل من التفكير فيها - لا اعرف السبب

2- لا اغش لأن : بييجي علي دماغي في الاخر و ربنا بيعاقبني و معرفش احل - عشان زميلي مش احسن مني عشان اطلب منه حاجة - مش عايز حد يكون له فضل عليا !! - عشان معطلش زميلي .

3-نعم اساعد علي الغش لأن/بشرط  :  بشرط انه يكون صاحبي  - بشرط انها متفرقش بيني و بينه في التقدير - لأنه بيكون منهار - لأنه بيصعب عليا - لأن من فرج عن مؤمن كربة من كرب الدنيا فرج الله عنه كربة من كرب الاخرة.

4-اغش و لكن لا اغشش : اغش لو مش عارف المعلومة و لا اغشش لأني اريد التفوق وحدي !!

5-لا اغش و لا اغشش لأن : مسألة مبدأ و من غشنا فليس منا .

فيتضح من الاجابات اختلاف النظرة للموقف فمنهم من يري انها جدعنة و مساعدة بل انها حاجة كويسة و منهم من يري انها عمل غير اخلاقي مخالف للمبادئ و التعاليم الدينية . فايه هي الاخلاق دي اساسا ؟!

تعريف الاخلاق :
من وجهة النظر العامة ممكن نقول ان الاخلاق انك متعملش حاجة حرام او مخالفة للمبادئ  او ممكن نقول ان التصرف الاخلاقي هو التصرف اللي بيراعي مصالح و مشاعر الاخرين و لا يخرج عن المبادئ .

ومش لازم التصرف الغير اخلاقي يكون صادر من منحرفين او مسجونين ,,, التصرفات الغير اخلاقية موجودة حوالينا في كل حتة مش لازم اروح سجن مثلا و اشوف تصرفات المجرمين او مش لازم انزل منطقة شعبية عشان اشوف تصرفات غير اخلاقية لأن التصرفات الغير الاخلاقية بتحصل حولنا بشكل يومي بل انها بقت من روتين حياتنا اللي نمش حاسيين بيه !

امثلة علي التصرفات الغير اخلاقية  اللي بنعملها  و احنا مش حاسيين انها غير اخلاقية  : 
1- احدي الطالبات تسكن علي بعد 15 دقيقة من الكلية و لكن لما بتخلص محاضرتها الساعة 2 بتروح البيت في 90 دقيقة !!! و السبب ان دي ساعة ذروة و الطلبة عايزين يروحو فبيتدافعوا لركوب الميكروباص و هي مش عايزة تحتك مع حد فبتستني لغاية ما يخلص الزحام و تركب !  لو بصيت للموقف هتلاقي البنت من حقها تركب من غير ماحد يضايقها بس الطلبة برضو عايزين يروحو وفي منهم اللي ساكن بعيد او في محافظة تانية !

2-الزحام علي المحاضرات و تدافع الطلاب علي مدرج له باب واحد مع ان الحل بسيط جدا  و هو الانتظار حتي خروج من بداخل المدرج  ثم الدخول في طابور منظم !!

3-الزحام عند ظهور النتيجة و تدافع حوالي 400 طالب كلهم عايز يعرف النتيجة  مما أدي لحدوث حالة اغماء لاحدي الطالبالت في سنة من السنين !!و لو سألت حد ليه كده هيقولك انا متوتر و عايز اعرف درجتي و ممكن يلقي اللوم علي الكلية انها تطلع النتيجة وسط اليوم الدراسي في ورقة صغيرة في ممر ضيق يعني كل واحد بيفكر في مصلحته بس ميهموش الاخر  ! فاقترح عليهم الدكتور انهم يعملوا طابور و لما نفذوا الفكرة كل واحد شاف نتيجته في هدوء و بدون احتكاك وفي زمن اقل !

4- القاء الطلاب للاوراق في الكلية رغم ان اغلبهم علي درجة من الوعي انه ميعملش كده بس هو مش مهتم بالمكان لانه مش بتاعه و ده مثال لعدم الاهتمام بمصالح الاخرين .

من الامثلة اللي فاتت نشوف ان التصرفات الغير اخلاقية دي ممكن اي حد منا يعملها مش المجرمين بس...يعني اكيد انك قمت باحد هذه التصرفات ان لم يكن كلها و لو مرة واحدة رغم انك طالب هندسة مش مجرم او منحرف .

و رغم ان الامثلة اللي فاتت سهلة نسبيا الا اننا ممكن نلاقي اختلاف في الحكم عليها من حيث كونها اخلاقية او غير اخلاقية فما بالك فالقضايا الاصعب من كده !!

من هنا ظهرت الحاجة الي بعض القواعد نحتكم اليها للحكم علي التصرف كونه اخلاقي او غير اخلاقي !

القواعد التي نحتكم اليها للحكم علي المسائل الاخلاقية الصعبة :

1-القاعدة الذهبية : عامل الاخرين بما يحب ان يعاملوك به.

2-القاعدة الفضية : لاتعامل الاخرين بما لا تحب ان يعاملوك به ... و رغم اتفاق القاعدتين في المعني تقريبا لكن القاعدة الذهبية تمثل الجانب الايجابي "عامل"  بينما القاعدة الفضية تمثل كف الاذي

و لتوضيح الفارق بين القاعدتين : مثلا القاعدة الفضية بتقول متخبطش حد بالعربية و تسيبه و تجري لأنك اكيد متحبش يحصل فيك كده
لكن لو طبقنا القاعدة الذهبية في الموقف ده هنقول لو لقيت حد خبطته عربية تانية  انزل ساعده لأنك اكيد تحب يحصل معاك كده
يعني القاعدة الذهبية اشمل من الفضية بل ممكن تغني عنها.

و القاعدة الذهبية موجودة في كل الاديان و الفلسفات :

في الاسلام :  يقول الرسول صلي الله عليه وسلم " لا يؤمن احدكم حتي يحب لأخيه مايحب لنفسه "
و في الانجيل يقول السيد المسيح عليه السلام "كما تحبو ان يفعل الناس بكم فافعلو انتم ايضا بهم "

ومن المواقف اللي حصلت للدكتور : انه كان في كندا بيعمل عملية الزائدة و لفت نظره ان في ممرضة طول فترة عملها شعلة من النشاط لدرجة انها لفتت نظر الدكتور فسألها ليه بتعمل كده فكان ردها انها بتتعامل مع المريض كأنه ابنها فتعامله زي ما هي تحب ان ابنها يتعامل في اي مستشفي .

3- المنفعة العامة : حيث ان كل ما يحقق منفعة عامة للناس فهو اخلاقي

و في القرآن الكريم  " يسألونك عن الخمر و الميسر قل فيهما اثم كبير و منافع للناس و اثمهما اكبر من نفعهما"    فعندما تزيد الضرر عن المنفعة يعتبر الموضوع ضار و العكس صحيح.

و لتوضيح مبدأ المنفعة العامة نشوف المواقف دي :

1- لو شغال في مصنع سيارات و واحد قالك ان شغلتك حرام لأن اكبر عدد وفيات في العالم  من حوادث السيارات ولكن بتطبيق مبدأ المنفعة العامة نجد ان العمل %100 اخلاقي لأن النفع العائد علي الناس من استعمال السيارات اكبر بكتير من ضرره

2- لو طبقنا المثال السابق علي شخص يعمل في مصنع سجائر نجد ان الضرر اكبر بكثير من النفع فيعتبر العمل غير اخلاقي

و لكن توجد بعض المواقف التي تحقق المنفعة العامة و لكنها غير اخلاقية مثل :

روبين هوود : كان يسرق الاغنياء ليعطي الفقراء و  لو نظرنا للموضوع نجد انه يحقق المنفعة العامة حيث انه يفيد الاكثرية " الفقراء" و في نفس الوقت لايضر الاقلية الذين لن يموتوا جوعا نتيجة سرقة او اثنان و لكن اذا نظرنا للقضية من نظرة اخري نجد انه عمل غير اخلاقي تماما حيث انه يقوم بسرقة و يأخذ مالا يستحق و لايملك. 

4- المبادئ و القيم الدينية : فلايجوز تحقيق المنفعة العامة علي حساب المبادئ

و  للحكم علي اي قضية كونها اخلاقية او لا اخلاقية نتبتع الفواعد السابقة في التسلسل الاتي

 مبدأ المنفعة العامة ثم المبادئ و القيم الدينية ثم مبدأ المنفعة العامة

و بذلك اصبح من السهل الحكم علي اي قضية كونها اخلاقية او غير اخلاقية فتطبيق هذه القواعد علي موضوع روبين هود نجد انه عمل غير اخلاقي رغم انه يحقق المنفعة العامة لكنه يعارض المبادئ و القيم و لايجوز ان تفضل المنافع العامة علي المبادئ و القيم الدينية ...

و في المحاضرة السابقة ذكرنا مثال مدير المدرسة اللي طلب من مهندسة تركيب نظام لمراقبة الفصول دون ان يشعر الطلاب او يعلموا فهو يريد تحقيق منفعة عامة و هي زيادة جودة التعليم و لكن تعارضت هذه المنفعة مع مبدأ ديني و هو " لاتجسسوا " فاصبح العمل غير اخلاقي.

و رغم ان ال Customer service في  شركات المحمول و البنوك يمكنها مراقبة المكالمات لضمان جودة الخدمة " منفعة عامة " الا انه لا يعتبر عمل غير اخلاقي حيث ان الشركة تعلن في بداية المكالمة ان المكالمة مراقبة فلا يعتبر تجسس اي لا يعتبر مخالفا للقيم

بتطبيق هذه المبادئ الثلاث السابقة يمكننا الحكم علي التصرف هل هو اخلاقي ام لا و لكن يوجد قضايا اخري تحتاج لمزيد من القواعد للحكم عليها و ده اللي هندرسه في المحاضرات القادمة

اخلاقيات المهنة

اي مهنة يجب ان تشمل في دراستها جانبين :
1-جانب مهني : و هو الجزء الذي يهتم بالمادة العلمية التي تستخدمها في عملك بعد التخرج
2- جانب اخلاقي : يهتم بأخلاقيات المهنة و كيفية التصرف في الكثير من المواقف الغير مهنية  التي تواجهها اثناء حياتك و اثناء الدراسة بعد التخرج و لا تجد لها حل في المواد العلمية الهندسي
و لذلك تنقسم المواد التي ندرسها في كلية الهندسة الي قسمين :
1-مواد هندسية : مثل microprocessor ,Control , Communications و غيرها من المواد التي قد تستخدم كلها او بعضها علي الارجح في عملك بعد التخرج كما انها تعطيك طريقة التفكير الهندسي التي تميزك عن غيرك
2- مواد غير هندسية :حيث ان الهدف الاساسي من مهنة الهندسة هو حل مشاكل الناس فيجب دراسة كورس ليس بهندسي و لكن يربط المهندس بعالم ما خارج العمل او الكلية حتي يستطيع التعامل مع المجتمع
فدراسة المواد غير المهنية "الهندسية" مهم جدا في الحياة العملية و الاجتماعية  حيث انه عندما نختار شخص لوظيفة نراعي الاعتبارات الاخلاقية بجانب الكفاءة  فمثلا :
 اذا وضعت في موقف انك احتجت لمحامي في قضية ما و تعرف محامي ذو كفاءة عالية جدا و لكنه معروف عنه انه ممكن يبيع ورق قضيتك للخصم اذا دفع له الخصم مبلغ من المال هل ستركن الي اعتبارات الكفاءة و تذهب للمحامي ام ستأخذ الجانب الاخلاقي في الاعتبار وتصرف نظرك عن الاستعانة به ؟؟!
فيتضح انه توجد اعتبارات اخلاقية بجانب الكفاءة تحكم بعض المواقف التي نتعرض لها و يتجلي هذا المعني في قصة سيدنا يوسف عندما قال لحاكم مصر " اجعلني علي خزائن الارض اني حفيظ عليم " ففي هذا الوقف كانت مصر تمر بمجاعة لمدة 7 سنوات فطلب هذه الوظيفة لسببين : سبب اخلاقي "حفيظ" اي يحفظ الامانة و سبب مهني "عليم " يعلم كيف يؤدي هذا العمل.
و الخطأ الاخلاقي في مهنة الهندسة كارثي حيث يُقال ان " الخطأ الاخلاقي في اي مهنة غير الهندسة قد يؤدي لوفاة شخص بينما الخطأ الاخلاقي في مهنة الهندسة قد يؤدي الي وفاة الكثير من الناس"
 وهناك امثلة عديدة علي الاخطاء الاخلاقية التي تحدث في حياتنا بصورة شبه يومية مثلا :
- سقوط عمارة ليس لسبب هندسي كعيب في التصميم او القواعد والاساسات ولكن  لأن المقاول عايز يوفر في الحديد (سبب اخلاقي ) مما ادي لموت الكثير من الناس.
- الكارثة الاكبر في التاريخ الهندسي و هي غرق السفينة  "تيتانك " ولم يكن السبب هندسي فالسفينة اصطدمت بجبل جليدي و هذا ممكن ان يحدث في اي وقت ولكن الكارثة الاكبر عدم وجود عدد كافي من قوارب النجاة حيث كان يوجد في السفينة 750 قارب نجاة في حين انها كانت تحمل 2500 راكب !! رغم ان السفينة كانت تعلم بهذا و لكنها رفضت زيادة عدد قوارب النجاة لاعتبارات جمالية و للتفاخر بان السفينة بها اعلي معدلات الامان فلن تغرق.
-غرق العبارة المصرية السلام و المهازل الأخلاقية في الرقابة و التفتيش علي هذه العبارة.
و اي شخص معرض لمثل هذه المواقف في حياته ولكن المشكلة اننا في مصر لا نهتم بدراسة مثل هذه المواد رغم انها من المواد الاساسية في الخارج و يدرس طالب الهندسة في الخارج 4 مواد غير هندسية يختارهم حسب رغبته بل انه لكي تحصل علي رخصة العمل كمهندس يجب ان تجتاز "اختبار اخلاقيات" و "اختبار قانون" بالاضافة الي دفع الرسوم و ما شابه و لكن عندنا في مصر بالرسوم فقط و تحصل علي الشهادة.
بينما في الخارج يهتمون بالجانب الاخلاقي بنفس درجة اهتمامهم بالجانب المهني بل ان "بيل كلينتون " الجهة الوحيدة التي لم تسامحه علي فضيحته هي نقابة المحاميين لأنه ارتكب ارتكب اكبر جريمة يمكن ان يرتكبها ممارس قانون و هي الكذب تحت القسم فكانت عقوبته الحرمان 5 سنوات من ممارسة مهنة المحاماة !!
و في الكثير من الاحيان يلتبس الامر علينا فلا نعرف هل هذا الفعل اخلاقي ام غير اخلاقي و امثلة علي ذلك :
>>  نسخ السوفت وير و برامج الكومبيوتر هل هي عمل اخلاقي ام غير اخلاقي ؟!
>> مهندسة طلب منها مدير احد المدارس ان تصمم نظاما لمراقبة التلاميذ في الفصول بكاميرات المراقبة و ذلك لرفع جودة التعليم و الاهتمام بمشاكل الطلاب و لكن اشترط المدير ان يكون نظام المراقبة سري لا يعرفه احد غير المدير نفسه ويتابع الفصول من مكتبه ,,, فهل مثل هذا التصرف اخلاقي ام غير اخلاقي ؟!
>> مهندس صاحب شركة ذهب لتايوان لكي يستورد بعض المكونات من بينها Power supply و عند اتمام البيع سألته الشركة هل تريد ال label علي الاجهزة 170 watt ولا 200 watt فكان رده 170 watt طبعا لانها القدرة الحقيقية للجهاز و استغرب هذا السؤال فكان رد الشركة ان جميع المستوردين المصريين يفعلون ذلك,,,, و عندما عاد لمصر قلت المبيعات رغم انه نفس الجهاز الذي يشتريه الناس بنفس الامكانيات  فهل يغير ال label ام يستمر في خسائره ؟!!
فيتضح مما سبق احتياجنا لمجموعة من القواعد التي تعلمنا كيفية و هو ما سنتناوله في هذا الكورس بحيث نناقش القضية و نستمع للاراء المختلفة مع عدم التعصب في الرأي و الشجاعة في ابداء رأيك و الدفاع عنه